ԻՆՉՈՒ Է ՇՏԱՊՈՒՄ ԱԴՐԲԵՋԱՆԸ
Պարզ պատճառով. քանի դեռ Ռուսաստանը լծակներ ունի Հայաստանում, «Զանգեզուրյան միջանցք» պոկել (ռուսնե՛րի միջոցով):
Ուկրաինական պատերազմից հետո Ռուսաստանի դիրքերը բոլո՛ր երկրներում (Հայաստանը ներառյալ) թուլանալու՛ են. և սա բոլորն են հասկանում: ԱՆՆԱԽԱԴԵՊ պատժամիջոցներից փրկվելու համար Մոսկվան 2 բան պիտի անի՝ ա) սիրաշահի չինական և՛ թյուրքական աշխարհին, և բ) խոչընդոտի Իրան-(Սյունիքով)Հայաստան-Վրաստան-Եվրոպա առանցքի բացմանը (հատկապես գազի տեղափոխմանը): ԵՄ-ն որոշել է 2027-ից հետո ռուսական գազ այլևս չօգտագործել (որը հնարավոր է միայն իրանակա՛ն գազի օգնությամբ): Իմիջիայլոց՝ Ռուսաստանը Սիրիա ներխուժեց գազի տեղափոխումը Սիրիայի տարածքով Միջերկրական ծով թույլ չտալու համար (Ուկրաինա ներխուժման հիմնական նպատակը էլի գազը չէ՞):
Ադրբեջանին «Զանգեզուրյան միջանցք» տրամադրելով՝ Ռուսաստանը «մեկ կրակոցով 2 թռչուն կխփի». կապել թյուրք-չինական աշխարհը (ըստ իրենց՝ Սյունիքում ռուսակա՛ն բանալիով) և՛ խոչընդոտել Իրան-Հայաստան կապը: Սյունիքի տարածքը Ռուսաստանը de jure/իրավաբանորեն չի կարող տալ Ադրբեջանին: «Միութենական պետություն» կոչվածը հենց սրա համար է. որ նաև de jure/իրավաբանորեն Մոսկվան Երևանի անունից փաստաթղթեր ստորագրի (նաև այս հարցում): 22.02.2022 թ ռուս-ադրբեջանական համատեղ դաշնակցության «Հռչակագրով» (որը՝ ըստ միջազգային իրավունքի՝ լիիրավ պայմանագիր է), Ռուսաստանը նաև փաստաթղթո՛վ ԼՂ/Արցախը ճանաչեց Ադրբեջանի մաս: Ռուսները թյուրքերին սիրաշահելու այլևս մեկ բան ունեն՝ «Զանգեզուրյան միջանցքը»: Արցախի/Հայաստանի հանդեպ վերջին սադրանքների համահեղինա՛կը Մոսկվան է (Հայաստանից նոր զիջումներ պոկելու համար): Քանի դեռ ռուս-ուկրաինական պատերազմը շարունակվում է, Հայաստանը պիտի ԽՈՍԻ խաղաղությունից (առանց ռուսական «միջնորդության» փաստաթղթեր ստորագրելու) և շարունակի՛ բանակցությունները Թուրքիայի հետ: Թուրքիան՝ երկրաշարժից հետո, ստիպված թեքվել է դեպի Արևմուտք,որը լա՛վ լուր է Հայաստանի համար:
2020 թ 44-օրյա պատերազմից հետո ԼՂ/Արցախը պիտի՛ դառնա ԱՌԱՆՁԻՆ (բանակցող) սուբյեկտ, որպեսզի ռուս-ադրբեջանական ճնշումները ՀՀ-ի վրա նվազեն/չեզոքացվեն: ԼՂ/Արցախը Ադրբեջանի հետ ԵՐԲԵՔ չպիտի՛ բանակցի միայն ռուսական «միջնորդությամբ», քանզի Մոսկվան ԼՂ/Արցախը արդե՛ն ճանաչել է «Ադրբեջանի մաս»: Արցախի/Սյունիքի (ուստի և ողջ Հայաստանի) անվտանգային ապագան ԱՄՆ/Ֆրանսիա և՛ Իրան/ Հնդկաստան առանցքների մեջ է. սա արդեն պարզից էլ պարզ է:
ՎԱՐԱԶ ՍՅՈՒՆԻ
Միջազգային իրավունքի մասնագետ/վերլուծաբան,
Նիդեռլանդներ, 12.03.2023
Հղումը՝