Ես համարում եմ, որ այն քաղաքականությունը, որը մենք այսօր վարում ենք, ճիշտ քաղաքականություն է։ Այս մասին Գերմանիայում հայ համայնքի ներկայացուցիչների հետ հանդիպման ժամանակ ասաց վարչապետ Նիկոլ Փաշինյանը։
«Այն պոզիտիվ արտահայտությունները, որը մենք կարող ենք տեսնել, այդ քաղաքականության արդյունք են։ Ինձ մի անգամ խորհրդարանում ընդդիմության ներկայացուցիչները հարց տվեցին, թե չե՞մ պատրաստվում հրաժարական տալ, բայց կներեք, Հայաստանի ոչ մի ղեկավար այնքան հրաժարական չի տվել, որքան ես, հո ես չե՞մ կարող ամեն շաբաթ հրաժարական տալ։ Տվել եմ հրաժարական, եղել են արտահերթ ընտրություններ, դրանք եղել են ազատ, արդար, ժողովրդավարական ու ժողովուրդը որոշել է, որ ես այս պատասխանատվությունը պետք է կրեմ։ Ինչքան էլ ծանր լինի ժողովրդի՝ իմ ուսերին դրած պատասխանատվությունը, ինչքան էլ ծնկներս ծալվելիս լինեն, ես այն պետք է կրեմ։ Եթե ես իմ պատասխանատվությունը թողնեմ, ասեմ վերջ, դրանից հետոն ինչ կլինի, դրա պատասխանատվությունը ո՞ւմ վրա է, էլի իմ։ Խնդիրը իմ մեջ չէ, այստեղ խնդիրը ժողովրդի որոշմանը հավատարիմ մնալու մեջ է։ Երբ մեկին մանդատ ես տալիս, հետո այն հետ չես վերցնում, բայց այդ մեկը մանդատը շպրտում է ու փախչում, դրանից ավելի մեծ դավաճանություն չկա»,- ասաց Փաշինյանը։
Նա ասաց, որ Հայաստանը պետք է լինի խաղաղ ու անվտանգ երկիր, սակայն Հայաստանի անվտանգային համակարգերը դավաճանել են։
«2020թ-ի նոյմբերի 9-ի հայտնի իրադարձություններից հետո մարդիկ գնացել էին օդանավակայան, ներխուժում էին թռիչքուղիներ, իրենք իրենց ներշնչել էին կամ հույս ունեին, որ ես Հայաստանից պետք է փախչեմ, բայց իմ քաղաքական կենսագրության ընթացքում ապացուցել եմ, որ փախչող չեմ։ Ես ինձ վրա դրված պատասխանատվությունը կրելու եմ մինչև վերջ»,- ասաց Նիկոլ Փաշինյանը՝ Գերմանիայում հայ համայնքի ներկայացուցիչների հետ հանդիպման ժամանակ։
Մանրամասները՝ տեսանյութում։