Zangi-ի հիմնադիր Վահրամ Մարտիրոսյանը ֆեյսբուքյան իր էջում գրել է.
«Իսրայելի ներկա վարչապետը զինվորական է եղել։ Իսրայելի վարչապետերի և քաղաքական դասի մի զգալի մասը նախկին զինվորականներ են։ Պետությունը չի կարող իրեն համարել ազգային, եթե պետության մեջ զգալի կշիռ չի կազմում զինվորական էլիտան։ Այսպես է նաև ԱՄՆ-ում և այլ ուժեղ պետականություն ունեցող ցանկացած երկրում։
Իսկ մեր ներկայի Հայաստանում, կլինի իշխանություն թե ընդդիմություն, իսպառ բացակայում է կռված դասը։ Այս հանգամանքը մեր պետականությունը դարձնում է ոչ լիարժեք և ոչ ազգային։ Զինվորական էլիտան դա պետության իմունիտետն է։ Ոչ մի պետություն ապահովագրված չէ պոպուլիստ դավաճանների կողմից իշխանության զավթումից, ինչպես որ ոչ մի օրգանիզմ ապահովագրված չէ վիրուսային վարակումներից։ Բայց երբ օրգանիզմում գործում է ուժեղ իմունային համակարգ, ապա ցանկացած վիրուսային վարակի դուրս մղումը դառնում է ուղղակի ժամանակի հարց։ Այսպես 98-ին մեր զինվորական էլիտան հեռացրեց ազգային շահերից շեղված քաղաքական տարրին։
Դիմում եմ մեր կռված տղերքին՝ եղեք ավելի ակտիվ, ձեր վրա վերցրեք պատասխանատվությունը։ Դուք նստել եք, իսկ ղառի յոթերը ազգի ճակատագրով են իբր զբաղված։
Մեկնաբանությունում կդնեմ մի տեսանյութ։ Տեսեք թե մեր կռված տղերքից մեկը ինչ հասուն քաղաքական մտքեր է արտահայտում։ Իրենց պրոֆեսիոնալ քաղաքական գործիչ ու քաղաքագետ համարողների մեծ մասին ուղղակի ծալում է մեր խնդիրների ճիշտ նկարագրությամբ ու դրվածքով»:
Աղբյուրը` Վահրամ Մարտիրոսյան