Սերժ Սարգսյանի նախագահության ժամանակահատվածում պաշտպանության նախարարի պաշտոնը զբաղեցրած Վիգեն Սարգսյանի նկատմամբ հայտարարվել է հետախուզում։ Այս մասին տեղեկանում ենք ՀՀ դատախազությունից։
Նշենք, որ Վիգեն Սարգսյանը մեղադրվում է պաշտոնեական լիազորություններն անցնելու մեջ: Ըստ իրավապահների՝ Սարգսյանը 2018 թվականի հունվարին պաշտպանական գերատեսչության հաշվեկշռում գտնվող շենքի բնակարանների բաշխման գործընթացում դիտավորությամբ կատարել է իր լիազորությունների շրջանակից ակնհայտորեն դուրս գործողություններ:
Հիշեցնենք, որ Երևանի ընդհանուր իրավասության դատարանն ավելի վաղ բավարարել էր ՀՀ պաշտպանության նախկին նախարար Վիգեն Սարգսյանին կալանավորելու միջնորդությունը: