Քաղաքագետ Ստյոպա Սաֆարյանն իր ֆեյսբուքյան էջում գրել է…
Եվ ամենատխուրը. այն բանից հետո, երբ Լավրովը վերստին հայտարարում է, թե Արցախի լուծման հարցում Ռուսաստանն ինչ է դավանել ու ում երկրպագել, երբ բացահայտում է, թե 20 տարի Ռոբերտ Քոչարյանն ու Սերժ Սարգսյանն ինչ են բանակցել, որ Ընդհանուր պետության (1998), Մեղրիի (1999), Քիվեսթի (2001), Մադրիդյան (2007), Կազանյան (2011), Լավրովյան (2015) տարբերակներով անխտիր համաձայնել են 5+2 շրջանների վերադարձին, այսինքն իրենք էլ դա Հայաստանին պատկանող չեն համարել, ահա, այդքանից հետո Ռոբերտ Քոչարյանն ու Սերժ Սարգսյանն ինչու իրենց անմիջական շրջապատին ու կողմնակիցների չեն սաստում’ «Մի ասեք, որ հայրենիքի 70 տոկոսը հանձնվել կամ կորսվել է, մի ասեք դա, որովհետև դա մենք էլ հայրենիք չենք ճանաչել….» Պարտավոր են ասել….
Ստորեւ տեղադրված է Լավրովի խոսքերը՝
Հիմա երբ և Հայաստանը, և Ադրբեջանը ԵՄ-ի հետ միասին ստորագրել են փաստաթուղթ՝ պատրաստակամություն հայտնելով կնքել «Խաղաղության պայմանագիր» 1991թ. կնքված Ալմա-Աթայի հռչակագրի պայմանների հիման վրա, մեզ համար արդեն դժվար է կողմնորոշվել հետագա քայլերում։ Այս մասին այսօր՝ փետրվարի 2-ին, ռուսական ԶԼՄ-ներին տված հարցազրույցի ժամանակ ասել է ՌԴ ԱԳ նախարար Սերգեյ Լավրովն ու պարզաբանել. «Ալմա-Աթայի հռչակագրում ասված է, որ նոր անկախ պետությունների միջև սահմաններն անցնելու են ԽՍՀՄ, միութենական հանրապետությունների վարչական սահմաններով ՝ ներառյալ հայկական ԽՍՀ-ն և ադրբեջանական ԽՍՀ-ն, և ադրբեջանական ԽՍՀ-ի կազմում էր գտնվում Լեռնային Ղարաբաղի Ինքնավար Մարզը։ Այնպես որ, այստեղ բազմաշերտ իրավիճակ է, և այն, որ ՀԱՊԿ-ն այս ոչ պարզ իրավիճակում պատրաստել է խաղաղապահ առաքելության իրագործման նախագիծ, դա մեծ առաջընթաց է, և այդ առաջարկությունը դեռ սեղանին է, եթե մեր հայ գործընկերները համաձայն են՝ այդ առաքելությունը կարող է 1-2 օրվա ընթացքում իրագործվել»։